文：本香猛
Netflix 新動畫《機動戰士高達︰復仇的安魂曲》現正熱播，雖然 CG 一般兼劇情左膠大愛令 Fans 狂派嬲嬲，不過有高達就有玩具，Bandai 旗下 Tamashii Nations 亦按計劃推出高達 EX 超金合版。
《機動戰士高達︰復仇的安魂曲》劇本、導演均為歐美人士，機體設計則是《08 小隊》山根公利，走寫實軍事風格，睇慣 Seed Freedom 美型高達的 Fans 紛紛話醜，但筆者就覺得可以接受，係衰在頭部太似柯博文。講番隻超合金，全高約 185mm，關節及裝甲均採用富有重厚感的壓鑄合金配件製成，相信頗為重手；同時近乎全白的塗裝用上光澤感不強的啞色，金屬感一般更顯原設的低調風格。另外，劇中高達經常黑夜出動，全身只有雙眼發光，相信劇組是想藉此強化白色惡魔形象。此超合金特別在雙眼加入 LED，放在模型櫃內更加有 Feel。
官圖所見它全身有多個關節，能自然擺出揮劍、開槍、托炮、舉盾等不同姿勢，最正是舉手幅度甚高，可如同期 HG 般重現從膊頭拔刀出鞘的動作架勢。配件方面非常齊全，武器有光束步槍、盾牌、光劍、大砲及雙肩格林機槍等，盾牌製作細緻且有立體感，大砲有收納架可放於背部，而光劍更採用了漸變色處理，有助呈現出高熱感覺。
此作預計 2025 年 6 月上市，參考售價為 33,000 日圓，折約 HK$1,711，香港好多舖都只收約 HK$1,800 訂價，一改最近逢高達必炒的定律，究其原因是網友們都嫌醜，反而更期待積木渣古及老虎超合金化，始終此劇設定上自護軍要型許多呢！
